बागलुङ । सम्पदा अवलोकन गराउने क्रममा यसपटक हामी बागलुङ जिल्लामा अवस्थित कालिका मन्दिरमा पुगेका छौं । हरेक वर्षको चैते दसैं र बडा दसैंमा विशेष पुजाअर्चना हुने यस मन्दिरमा दशैंको अवसरमा नवदुर्गाको पुजाका लागी श्रद्धालु भक्तजनको घुइँचो लागेको छ ।
कुल १ सय ९० रोपनी क्षेत्रफलमा घना जंगलको मध्य भागमा अवस्थित यस मन्दिरको प्रांगणमा प्रत्येक मुख्य दिशामा चारवटा प्रवेशद्वारहरू छन् । मन्दिर परिसरमा शिव, राधा-कृष्ण, लक्ष्मी-नारायण र अन्य देवतालाई समर्पित अन्य साना मन्दिरहरूको विशाल सग्रह छ । हरेक वर्ष चैते दसैं, र वडादसैंका बेला यहाँ विशेष पूजा आरधना हुन्छ ।
विक्रम संवत् १५ सय ९१ मा पर्वतका राजा नारायण मल्लले पाल्पाकी राजकुमारी विश्रवादेवीसँग विवाह गर्दा राजकुमारीले कालिका देवीलाई साथैमा ल्याएको र कालीगण्डकी नदी किनारमा विधिपूर्वक यो मन्दिरको स्थापना गरिएको भन्ने इतिहास छ । धार्मिक, सांस्कृतिक र ऐतिहासिक मूल्यमान्यता बोकेको यस मन्दिरको दर्शन र पूजापाठ गरेमा मनोकामना पूरा हुने र शक्ति प्राप्त हुने जनविश्वास रहिआएको छ ।
यस मन्दिरमा हरेक वर्ष दशैंको बेला करिब ५ लाखसम्म भक्तजन आउने गर्छन् । यसबर्ष दर्शनार्थीहरुको उपस्थिती अझै बढ्नसक्ने कालिका भगवती मन्दिर व्यवस्थापन समितीले अपेक्षा गरेको छ । यहाँ वार्षिक सरदर करिब ५० लाखसम्म दर्शनार्थी आउने गरेको समितिको तथ्यांक छ । दैनिक हजारौं भक्तजनहरुले पूजा गर्ने, पञ्चवली दिने र भजनमा नाचगान गर्ने परम्परा पनि रहिआएको छ ।
हरेक वर्ष आश्विन शुक्लपक्ष प्रतिप्रदाकाका दिनदेखी महानवमीका दिनसम्म क्रमशः एक-एक दिन गरी नौ दिनसम्म फरक-फरक देवीको पुजा गर्ने गरिन्छ ।
शैलपुत्री, व्रहृमचारणी, चन्द्रघण्टा, कुशमन्डा, स्कन्दमाता, कात्यायनी, कालरात्री, महागौरी र सिद्धिदात्री गरी नवदुर्गा भवानीका नवरुपहरु विशेष पूजा हुने दसैंका बेला देशका विभिन्न स्थानबाट सर्वसाधारण कालिका मन्दिरसम्म पुग्ने गरेका छन् ।
