बारा । बारामा पिकअप भ्यानले मोटरसाइकललाई ठक्कर दिँदा एकजनाको मृत्यु भएको छ । अर्का एकजना घाइते भएका छन् ।
जितपुर-सिमरा उपमहानगरपालिका-१६ स्थित पूर्वपश्चिम राजमार्गको बाह्रकिलो नजिकै गएराति निजगढबाट पथलैयातर्फ गइरहेको प्रदेश ३–०३–००१ प ००३९ नम्बरको मोटरसाइकललाई विपरीत दिशाबाट आउँदै गरेको प्रदेश ३–०१०–२२ प ३१९७ नम्बरको पिकअपले ठक्कर दिएको थियो ।
उक्त दुर्घटनामा मोटरसाइकल चालक हेटौँडा उपमहानगरपालिका-११ बस्ने निशान श्रेष्ठको मृत्यु भएको जिल्ला प्रहरी कार्यालय बाराले जनाएको छ । निशानको टाउकोमा गहिरो चोट लागेको र उपचारका लागि निजगढको सामुदायिक प्रसुति अस्पताल लैजाने क्रममा बाटोमै मृत्यु भएको थियो ।
मोटरसाइकलमा पछाडि बस्ने मिलन बरुवाल घाइते भएका छन् । बरुवालको बाँया हात र ढाडमा चोट लागेको र उनको उपचार भइरहेको प्रहरीले जनाएको छ ।
ठक्कर दिने पिकअप गाडी र चालकलाई प्रहरीले नियन्त्रणमा लिएको छ ।
