काठमाडौं महानगरलाई भन्दाबढी अनुदान पोखरालाई

जेष्ठ १७, २०८० |कान्तिपुर टीभी संवाददाता
काठमाडौं महानगरलाई भन्दाबढी अनुदान पोखरालाई

काठमाडौं । सरकारले आगामी आर्थिक वर्षका लागि स्थानीय तहलाई २ खर्ब ९५ अर्ब २ करोड रुपैयाँ विनियोजन गरेको छ। यसमध्ये पोखरा महानगरपालिकाले काठमाडौंको भन्दा बढी अनुदान पाएको छ ।

सरकारले स्थानीय तहलाई ४ प्रकारका अनुदान दिँदै आएको छ । यसमध्ये सशर्त अनुदान कार्यसम्पादनका आधारमा दिइन्छ । संघीय सरकारले वित्तीय हस्तान्तरण मार्फत ६ वटा महानगरपालिकाका लागि १० अर्ब ३१ करोड ९८ लाख र ११ वटा उपमहानगरपालिकाका लागि १० अर्ब ४२ करोड २२ लाख रुपैयाँ छुट्याएको छ।

देशभरका ६ वटा महानगरपालिका मध्ये पोखरालाई सबैभन्दा बढी २ अर्ब ७६ करोड ३२ लाख बजेट छुट्याइएको छ। दोस्रोमा काठमाडौं महानगरपालिकालाई २ अर्ब १४ करोड ३१ लाख रुपैयाँ विनियोजन गरिएको छ। त्यस्तै भरतपुर महानगरपालिकालाई १ अर्ब ७५ करोड ३ लाख रकम छ्ट्याइएको छ। वीरगञ्ज महानगरपालिकाका लागि १ अर्ब ३३ करोड २ १ लाख छुट्याइएको छ भने बिराटनगर महानगरपालिकालाई १ अर्ब १९ करोड २४ लाख र ललितपुर महानगरपालिकालाई १ अर्ब १३ करोड ८७ लाख विनियोजन गरिएको छ।

देशभरका ११ वटा उपमहानगरपालिकामध्ये सबैभन्दा बढी हेटौँडा महानगरपालिकाले १ अर्ब १४ करोड ५ लाख रुपैयाँ पाउने भएको छ। इटहरीलाई १ अर्ब ८ करोड ४९ लाख र घोराही उपमहानगरका लागि १ अर्ब ७ करोड ३३ लाख छुट्याइएको छ । धरान उपमहानगरपालिकाले ९० करोड र जनकपुरधाम उपमहानगरपालिकाले ९४ करोड ४ लाख रुपैयाँ पाउने छन् । बाराका २ उपमहानगरपालिका मध्ये कलैयाले ८४ करोड ७३ लाख र जितपुर-सिमराले ८४ करोड ६३ लाख पाउने छन् ।

त्यस्तै, बुटवल उपमहानगरपालिकाले ८० करोड ८९ लाख र तुल्सीपुर उपमहानगरले संघीय सरकारबाट ९५ करोड ९६ लाख रुपैयाँ पाउने छन् । नेपालगञ्ज उपमहानगरपालिकाका लागि ८८ करोड ३८ लाख र धनगढीका लागि ९२ करोड ८५ लाख अनुदान छुट्याइएको छ । एउटा पनि उपमहानगर नरहेको कर्णाली प्रदेशको राजधानी वीरेन्द्रनगर नगरपालिकाले पनि आकर्षक अनुदान पाएको छ। बीरेन्द्रनगरले संघबाट १ अर्ब ६२ करोड ७४ लाख रुपैयाँ अनुदान पाउने भएको छ।


Image

कान्तिपुर टीभी संवाददाता

Kantipur TV HD, the most popular TV channel in Nepal, brings Nepal to its audiences. Its programmes provide in-depth analyses about the issues of the day and reflect the people’s voice.


Enter Kantipur TV HD
Advertisement