काठमाडौं । रूसी राष्ट्रपति भ्लादिमिर पुटिनले आगामी डिसेम्बरमा भारतको औपचारिक भ्रमण गर्ने क्रेमलिनले जनाएको छ।
क्रेमलिनका सहयोगी युरी उशाकोभले पुटिनले भारतीय प्रधानमन्त्री नरेन्द्र मोदीसँग सोमबार चीनमा हुने क्षेत्रीय शिखर सम्मेलनका अवसरमा पनि भेटवार्ता गर्ने जानकारी दिनुभयो ।
अमेरिकी राष्ट्रपति डनल्ड ट्रम्पले युक्रेनमा मस्कोलाई आक्रमण अन्त्य गर्न दबाब दिने अभियानअन्तर्गत नयाँ दिल्लीले रूसी तेलको ठुलो परिमाणमा खरिद गरेको सजायस्वरूप भारतीय सामानमा कर लगाउनुभएको छ ।
ऊर्जा आय मस्कोको बजेटको लागि राजस्वको एक प्रमुख स्रोत हो। रूस भारतको शीर्ष हतियार आपूर्तिकर्तामध्ये एक हो र दुई देशबीचको न्यानो सम्बन्ध सोभियतकालीन हो।
सन् २०२२ को फेब्रुअरीमा मस्कोले सैन्य आक्रमण सुरू गरेयता युक्रेनका पश्चिमी मित्रराष्ट्रहरूले रुसको निर्यात-आयमा कटौती गर्न खोजेका छन् तर रूसले युरोपबाट भारत र चीनलगायत देशहरूमा ऊर्जा बिक्रीलाई पुनर्निर्देशित गर्न सक्षम भएको छ । इन्धन बिक्रीले अर्बौँ डलरको कोषको प्रवाहलाई जारी राखेको छ।
अन्तर्राष्ट्रिय फौजदारी अदालत (आइसीसी) ले पक्राउ पुर्जी जारी गरेका कारण पुटिनले युक्रेनमाथिको आक्रमणपछि आफ्नो विदेश यात्रामा उल्लेखनीय कटौती गर्नुभएको छ ।
भारत आइसीसीको पक्ष राष्ट्र होइन र त्यसैले पुटिनलाई हिरासतमा राख्न बाध्य छैन ।
