काठमाडौं । भारतले ७९औँ स्वतन्त्रता दिवस भव्यताका साथ मानाइरहेको छ । दिल्लीको लालकिल्लाबाट भारतीय प्रधानमन्त्री नरेन्द्र मोदीले देशवासीलाई सम्बोधन गर्नुभयाे ।
मोदीको बुक्रबाको सम्बोधन ऐतिहासिक पनि छ । प्रधानमन्त्री मोदीको लालकिल्लाबाट यो १२औँ पटकको सम्बोधन हो । साथै मोदीले १०३ मिनेट लामो भाषण गर्नुभयो । जुन भारतको इतिहासमा कुनैपनि प्रधानमन्त्रीले स्वतन्त्रता दिवसको अवसरमा दिएको सबैभन्दा लामो भाषण पनि हो ।
प्रधानमन्त्री मोदीले आफ्नो सम्बोधनमा ‘आत्मनिर्भर भारत’ र सन् २०४७ सम्म ‘विकसित भारत’ को दृष्टिकोणलाई जनता सामु राख्नुभएको छ ।
प्रधानमन्त्री मोदीले देशभित्र रोजगारी प्रवर्द्धन गर्नका लागि ‘प्रधानमन्त्री विकसित भारत रोजगार योजना’ नामको नयाँ योजनाको पनि सुरूआत गरिएको घोषणा गर्नुभयो ।
एक लाख करोड रूपैयाँ खर्च हुनेगरी बनाइएको रोजगार योजनामा निजी क्षेत्रमा पहिलो रोजगारी पाउने युवा-युवतीलाई १५ हजार भारतीय रूपैयाँ दिने घोषणा गर्नुभयो ।
रोजगारी दिने कम्पनीहरूलाई पनि प्रोत्साहनस्वरूप सहयोग गरिने प्रधामन्त्री मोदीले बताउनु भयो । प्रधानमन्त्री विकसित भारत रोजगार योजनाले ३ करोड ५० लाख बढी युवा युवतीलाई नयाँ रोजगारको अवसर प्रदान गर्ने उहाँले बताउनु भयो ।
आफ्नो लामो भाषणमा उहाँले पाकिस्तान र अमेरिकाको पछिल्लो कदमको आलोचना गर्नुभएको छ । देशको आत्मनिर्भरता केबल रूपैयाँ वा आयात–निर्यातमा सिमित नभएको बताउँदै प्रधामन्त्री मोदीले अब पनि अन्य देशहरूमा निर्भर रहनु ‘विनाशको बाटो भएको बताउनुभएको छ ।
प्रत्यक्ष रूपमा संयुक्त राज्य अमेरिकाको नाम नलिइकनै उहाँले अमेरिकी राष्ट्रपति डनल्ड ट्रम्पको ५० प्रतिशत शुल्क (ट्यारिफ) लगाउने धम्कीको जवाफ दिँदै आफू ‘पर्खाल बनेर उभिने’ र भारतीय किसानको हितको रक्षा गर्ने उहाँले प्रतिबद्धता व्यक्त गर्नुभयाे ।
