काठमाडौं । युक्रेनी राष्ट्रपति भोलोदिमिर जेलेन्स्की र युरोपेली युनियनको विरोधकै बीच अमेरिकी राष्ट्रपति डनल्ड ट्रम्प र रुसी राष्ट्रपति भ्लादिमिर पुटिनबीच आज अलास्कामा बार्ता हुँदैछ । रुस-युक्रेनबीच जारी युद्ध अन्त्यका लागि दुई नेताको भेटमा केहि ठोस सहमति हुने अपेक्षा गरिएको छ। तर युक्रेनको सहभागिता हुने वार्ताले गर्ने निर्णय आफूलाई मान्य नहुने राष्ट्रपति जेलेन्स्कीले बताउँदै आउनुभएको छ ।
क्रेमलिनका सल्लाहकार युरी उशाकोभका अनुसार भेटवार्ताको मुख्य एजेन्डा युक्रेन युद्ध नै रहनेछ। पुटिन र ट्रम्पले व्यापार तथा आर्थिक सहकार्यका विषयमा पनि छलफल गर्नुहुनेछ । शान्ति र सुरक्षा सुनिश्चित गर्ने व्यापक मुद्दाहरूका साथै अन्य अन्तर्राष्ट्रिय तथा क्षेत्रीय विषयहरू पनि एजेन्डामा रहने बताइएको छ ।
अलास्का वार्ता अगावै विवादमा पर्न सक्ने देखिएपछि अमेरिकाले जेलेन्स्कीलाई पनि सामेल गराउने प्रयास गरिरहेको थियो । युरोपेली युनियनले पनि जेलेन्स्कीलाई वार्तामा सहभागी गराउन अमेरिकालाई दवाव दिँदै आएको थियो ।
जेलेन्स्कीले वार्तामा आफु नहुँदा युक्रेनको भू–भागको भविष्यका बारेमा चिन्ता व्यक्त गर्नुभएको छ । उहाँले युद्धरत एक पक्षलाई अलग राखिएको वार्ताले मान्यता नपाउने टिप्पणी समेत गर्नुभएको छ ।
रुसी प्रतिनिधिमण्डलमा उशाकोभसहित विदेश मन्त्री सेर्गेई लावरोभ, रक्षा मन्त्री आन्द्रे बेलोसोभ, अर्थ मन्त्री एन्टोन सिलुआनोभ र व्यापारी किरिल दिमित्रिएभ रहने क्रेमलिनले जनाएको छ।
