एजेन्सी । भारतको जम्मू-कश्मीरको किश्तवाडमा मुसलधारे वर्षापछि आएको बाढीका कारण ३३ जनाको मृत्यु भएको छ ।
जम्मू-कश्मीरस्थित माता चण्डी मन्दिरको यात्रा सुरु हुने स्थान किश्तवाडको चसोटीमै बाढी गएपछि ठूलो जनधनको क्षति भएको हो । भारतीय सञ्चारमाध्यमका अनुसार मृत्यु हुनेमा दुई जना सुरक्षाकर्मीसमेत छन् । घटनामा १ सय २० जनाभन्दा बढी घाइते भएका छन् भने २ सय जना बेपत्ता भएका छन् । घटनालगत्तै सुरक्षाकर्मीहरु उद्धारमा खटिएका छन् भने अहिलेसम्म ५० जनाको उद्धार गरिएको छ । सामाजिक सञ्जालमा सार्वजनिक भएका भिडियोमा तिर्थयात्रीहरुलाई सुरक्षित स्थानमा लैजाँदै गरेको देखिएको छ ।
भारतीय प्रधानमन्त्री नरेन्द्र मोदीले घटनाप्रति दुःख व्यक्त गर्दै प्रभावितहरुलाई हरसम्भव सहायता उपलब्ध गराउने बताउनु भएको छ । जम्मू-कश्मीरका मुख्यमन्त्री उमर अब्दुल्लाहले बाढी प्रभावित क्षेत्रमा राज्यका सबै संशाधन परिचालित गरिएको बताउनुभएको छ ।
