वीरगन्ज । हुलास स्टिल उद्योगले आफ्नो दोस्रो प्लान्टका रूपमा नेपालकै ठुलो गेल्भनाइजिङ प्लान्ट स्थापना गरी उत्पादन सुरु गरेको छ ।
गोल्छा अर्गनाइजेसनले पर्साको बेल्वामा दोस्रो प्लान्ट स्थापना गरी आजदेखि उत्पादन सुरु गरेको हो । हिप्को ब्रान्डको नामले स्थापना भएको हुलास स्टिलको दोस्रो प्लान्टबाट मुलुकमा आवश्यक पर्ने विद्युत् पोल, ट्रान्समिसन लाइनको पोल, फ्लड लाइट टावरजस्ता स्टिलका गेल्भनाइज पाइप उत्पादन गरिने निर्देशक हिमांशु गोल्छाको भनाइ छ ।
हुलास स्टिलले स्थापनाको ४३ वर्ष पूरा गरेको अवसरमा एक अर्ब लगानीमा प्लान्ट स्थापना गरेको । प्लान्टले वार्षिक १० अर्ब रुपैयाँ बराबरको सामग्री उत्पादन गर्ने लक्ष्य छ । झन्डै सात सयजना स्थानीयलाई प्रत्यक्ष रोजगारीमा जोड्ने उद्योगले जनाएको छ ।
गोल्छा अर्गनाइजेसनले तीन वर्षअघि बेल्वामै स्टिलबाट निर्मित ठुला-ठुला सेड बनाउने प्रि-इन्जिनियनिङ बिल्डिङ पीईबी निर्माण गरी उत्पादन थालिसकेको छ ।
