धनकुटा । धनकुटाको सेउलेमा अत्याधुनिक ड्रायर मेसिनसहितको खेतिपाती अर्गानिक उद्योग सञ्चालनमा आएको छ ।
सिजनअनुसारका फलफूल, तरकारी र मसलाबाली उत्पादन, संकलन, प्रशोधन र निर्यातको उद्देश्य राखेर उद्योग सञ्चालनमा ल्याइएको हो ।
उद्योगले किसानबाट खरिद गरिएको आँप, लिची, एभोकाडो, केरा, स्टवेरी, अदुवा, लसुन र खुर्सानीलगायतका कृषि उत्पादन अत्याधुनिक प्रविधमा सुकाएर प्याकेजिङ तथा निर्यात सुरु गरेको हो ।
करिब १० करोड रूपैयाँको लगानीमा खुलेको उद्योगले किसानका उत्पादन खरिद गरी प्रशोधन गरेर मध्यपूर्व, यूरोप र अमेरिकी मुलुकमा निर्यात गरिरहेको सञ्चालक प्रकृति गौतमको भनाइ छ ।
उद्योगले अहिले तराई र काठमाडौंसहित धनकुटा, भोजपुर, तेह्रथुम संखुवासभालगायत स्थानबाट कृषि उत्पादन संकलन गरिरहेको छ । गाउँमै प्रशोधन उद्योग सञ्चालनमा आएपछि स्थानीय उत्पादक उत्साहित भएका छन् ।
तर कच्चा पदार्थ र थप लगानीको अभावमा उद्योगले अहिले क्षमताको ४० प्रतिशत मात्रै उत्पादन गरिरहेको संचालक गौतमले बताउनुभयो ।
