काठमाडौं । अरनिको राजमार्गको भोटेकोशी गाउँपालिका-२ कोप्लाङमा तीन मिटर सडक भासिँदा तातोपानी नाका तीन दिनदेखि ठप्प छ । चीनबाट फलफूल, लत्ताकपडा र कृषि सामग्री बोकेर आएका करिब २० कन्टेनर तीन दिनदेखि अडि्कएका छन ।
यातायात अवरुद्ध हुँदा चीनतर्फ सामान लिन हिंडेका ३० वटाजति कन्टेनर तातोपानीको दश किलो र लिपिङ बजारक्षेत्रमा रोकिएको तातोपानी भन्सार प्रमुख कमलप्रसाद भट्टराइले बताउनुभयो । सडकको अवरोधले आयात ठप्प हुँदा दैनिक राजस्व संकलनमा पनि असर परेको छ ।
दुई दिनदेखि सडक विभागले अन्य ठाँउको माटो ल्याएर सडक मर्मतको काम गरिरहेको छ । तर भासिने क्रम जारी रहेकाले ठूला भारका सवारीसाधन चलाउन नसकिएको भोटेकोशी गाँउपालिकाका प्रमुख पासाङनुर्पु शेर्पाले जानकारी दिनुभयो ।
अवस्था हेर्दा अझै तीन-चारदिन सडक सञ्चालनमा आउन नसक्ने अवस्था रहेको उहाँले बताउनुभएको छ । यसैबीच खासाबाट तातोपानी भन्सार जाँदै गरेको नयाँ विद्युतीय कार भासिएको सडकबाट भोटेकोसी नदीमा खस्दा एकजना गम्भीर घाइते भएका छन ।
घाइतेको धुलिखेल अस्पतालमा उपचार भइरहेको छ । जोखिमपूर्ण सडकबाट कार ल्याउादा शुक्रबार बेलुका कार भोटेकोसीमा खसेको हो ।
