काठमाडौं । एक सातादेखि बढेको प्रदूषणको असर पर्यटन क्षेत्रमा समेत परेको छ । काठमाडौं विश्वको सबैभन्दा प्रदूषित शहर बनेपछि विदेशी पर्यटक नेपाल आउन हच्किएको पर्यटन व्यवसायीहरूले जनाएका छन् ।
अग्रिम बुकिङ गरेका पर्यटकले नेपाल आउने कि नआउने भन्दै बारम्बार फोन गरिरहेका छन् भने केहीले स्वास्थ्यको जिम्मा लिनुपर्ने बताएको टानका निवर्तमान अध्यक्ष नीलहरि बाँस्तोलाले बताउनुभयो ।
त्यस्तै नेपाल आएका पर्यटक पनि काठमाडौंमा नबसेर उपत्यका बाहिर जाने गरेका छन् । कतिपय पर्यटक त अन्तर्राष्ट्रिय विमानस्थल झर्ने बित्तिकै आन्तरिक जहाज चढेर बाहिरिएका छन् । बर्सेनि प्रदूषणको समस्या दोहोरिँदा पर्यटनमा समेत असर पर्ने गरेको व्यवसायीको भनाइ छ ।
