काठमाडौं । दुई साताअघि १५ प्रश्नको जवाफ मागेका ऊर्जा, जलस्रोत तथा सिँचाइमन्त्री दीपक खड्काले नेपाल विद्युत् प्राधिकरणका कार्यकारी निर्देशक कुलमान घिसिङसँग कुनै मतभेद नरहेको बताउनुभएको छ । मन्त्री खड्काले प्राधिकरणसँग मिलेर काम गरिरहेकाले घिसिङलाई हटाउने परिस्थिति नरहेको पनि बताउनुभयो ।
उर्जा मन्त्रालयमा आज आयोजित पत्रकार सम्मेलनमा एक सय दिनका मुख्य उपलब्धि सार्वजनिक गर्दै मन्त्री खड्काले डेडिकेटेड र ट्रंकलाइन बक्यौता उठाउने सम्बन्धमा मन्त्रालय र नेपाल विद्युत प्राधिकरणका बीचमा मतभेद नभएको बताउनुभएको हो । बक्यौताको विषय संसदीय समितिमा पुगिसकेको र त्यहाँबाट निर्णय आएपछि थप प्रक्रिया अघि बढाइने जानकारी दिनुभयो ।
रकम उठाउनका लागि उद्योगीहरुले विद्युत् उपभोग गरेको कुराको प्रमाण जुटाउने काम भइरहेको पनि उहाँको भनाइ छ । मन्त्री खड्काले बंगलादेशमा विद्युत् निर्यात गर्ने गरी भएको सम्झौतालाई मुख्य उपलब्धि भएको दाबी गर्नुभयो ।
मन्त्रालयले पछिल्लो १ सय दिनमा थप ठूला जलविद्युत आयोजना निर्माणदेखि निजी क्षेत्रमा लगानीको मनोबल उकास्ने काम गरेको दाबी गरेको छ । तर मन्त्रालयले गरेका कामको भने कुनै विवरण भेटिँदैन ।