काठमाडौं । जग्गाको कित्ताकाट खुले पनि आर्थिक शिथिलताका कारण घरजग्गा कारोबारमा सुधार आउन सकेको छैन । ब्याजदर सस्तिँदा र कित्ताकाट खुला हुँदा पनि घरजग्गा कारोबार झनै घटेको छ । गत वर्षको तुलनामा कारोबार घट्नुले घरजग्गा कारोबारमा थप शिथिलता आएको देखिएको छ ।
घरजग्गा कारोबार चलायमान बनाउने भन्दै गत भदौमा सरकारले जग्गाको वर्गीकरण बिनै पनि एक वर्षका लागि कित्ताकाट खुलाएको थियो । त्यसपछि जग्गाको कारोबार बढ्ने अपेक्षा थियो । तर लगानीकर्ता आकर्षित भएनन् । सहरी क्षेत्रका महंगाभन्दा नगरोन्मुख कम मूल्यका जग्गाको मात्रै कारोबार भएको देखिन्छ ।
त्यो पनि गत वर्षभन्दा कम हुँदा सरकारलाई प्राप्त हुने राजस्वसमेत घटेको छ । गत वर्षको असोजमा ४ अर्ब ८ करोड राजस्व प्राप्त भएकोमा यो वर्षको सोही अवधिमा ३ अर्ब ८ करोड मात्रै प्राप्त भएको छ । घरजग्गा कारोबार चलायमान गराउन राष्ट्र बैंकको मौद्रिक नीति बाधक भएको व्यवसायी बताउँछन् ।
गत वर्ष असोजमा ३९ हजार ८ सय ८१ वटा जग्गा किनबेच भएका थिए । तर यो वर्षको सोही अवधिमा झनै घटेर ३० हजार ५ सय कारोबारमा सीमित भएको छ ।
