काठमाडौं । नेपाल आयल निगमले डिजेल र मट्टीतेलमा मूल्य समायोजन गरेको छ । निगमले आज (मंगलबार) राति १२ बजेदेखि लागु हुने गरी मट्टीतेल र डिजेलमा प्रतिलिटर १० रुपैयाँ घटाएको हो ।
भारतीय आयल कर्पोरेसन (आईओसी) ले नेपाल आयल निगम (एनओसी) लाई आज (मंगलबार) पठाएको नयाँ मूल्यसूचीअनुसार पेट्रोलमा ९ रुपैयाँ ५२ पैसा र डिजेलमा ८ रुपैयाँ १३ पैसा प्रतिलिटरले घटेर आएको छ ।
सोहीअनुसार निगमको सञ्चालक समितिको आज बसेको बैठकले डिजेल र मट्टीतेलमा १०/१० रुपैयाँ प्रतिलिटरले घटाउने निर्णय गरेको निगमका प्रवक्ता मनोज ठाकुरले जानकारी दिए । निगमले पेट्रोल, हवाई इन्धन र खाना पकाउने ग्यासको मूल्य भने यथावत् राखेको छ ।
आईओसीले डिजेल र पेट्रोलको मूल्य हरेक १५ दिनमा र अन्य पेट्रोलियम पदार्थको नयाँ मूल्य सूची १/१ महिनामा एनओसीलाई पठाउने गरेको छ । आईओसीले आफ्नो लागत तथा कच्चा तेलको मूल्यका आधारमा एनओसीलाई नयाँ मूल्यसूची पठाउँछ । अहिले पेट्रोल प्रतिलिटर १७५ रुपैयाँ तथा डिजेल १६५ रुपैयाँमा बिक्री हुँदै आएको छ । अब प्रतिलिटर १० रुपैयाँ घटेसँगै डिजेल र मट्टीतेलको उपभोक्ता मूल्य १५५ रुपैयाँ भएको छ ।
