काठमाडौं । नेपाली राष्ट्रिय क्रिकेट टोलीले कप्तान रोहित पौडेलको अविजित शतकीय इनिङ्सको मद्दतमा साउथ अस्ट्रेलियाविरूद्ध एकदिवसीय अभ्यास खेलमा रोमाञ्चक जित हात पारेको छ ।
नेपालले घरेलु टोलीविरूद्ध २ विकेटको जित हासिल गरेको हो । यस जितसँगै नेपालको अस्ट्रेलिया भ्रमण पनि समाप्त भएको छ । ४५ ओभरमा भारिएको खेलमा नेपालले टस जितेर साउथ अस्ट्रेलियालाई ब्याटिङका लागि आमन्त्रित गरेको थियो ।
घरेलु टोलीले निर्धारित ओभरमा सबै विकेट गुमाएर २ सय ४२ रनको योगफल तयार पारेको थियो । उसका लागि ह्यारी मानेन्तीले सर्वाधिक ६३ रन, डुवित हूगानबोजमले ५३ रन, रायन किङले ३५ र म्याकेन्जी हार्भेले २४ रन बनाए । नेपालका नन्दन यादव र सोमपाल कामीले समान ३–३ विकेट लिए भने सन्दीप लामिछाने, शाहब आलम र रुपेश सिंहले समान १–१ विकेट हात पारे ।
जवाफमा नेपालले २ सय ४३ रनको लक्ष्य निर्धारित ओभर सकिन ५ बल बाँकी रहँदा पूरा गर्यो । आरिफ शेख ११, भिम सार्की १, कुशल भुर्तेल २८, आसिफ शेख ३, दिपेन्द्रसिंह ऐरी ९ र गुल्सन झा ३६ रनमा आउट भए ।
लेकेश बमले २ रन जोड्दा रुपेश सिंह गोल्डन डकमा आउट भए । १ सय ६१ रनमा ८ विकेट गुमाएको अवस्थामा कप्तान रोहित पौडेल र सोमपाल कामीले ८५ रनको अविजित साझेदारी गर्दै टोलीलाई जित दिलाए । रोहितले ९ चौकासहित १ सय १ रनको शतकीय इनिङ्स खेले भने सोमपाल कामी ४० रनमा नटआउट रहे ।
अस्ट्रेलिया भ्रमणका क्रममा टप–एन्ड टी–२० सिरिजको लिग चरणबाटै बाहिरिएको नेपालले यसअघि अस्ट्रेलियन क्यापिटल टेरिटोरीविरूद्धका दुबै टी-२० अभ्यास खेल जितेको थियो भने साउथ अस्ट्रेलियासँग पराजित भएको थियो ।
अव मध्य पूर्व भ्रमणको तयारीमा रहेको स्टुअर्ट लको टोलीले असोज ११, १२ र १३ गते सारजहाँमा २ पटकको टी–२० आई विश्वकप विजेता वेस्ट इन्डिजसँग टी–२० आई सिरिज खेल्ने छ ।
यो सिरिज टी–२० विश्वकपको एसिया तथा ईस्ट–एसिया प्यासिफिक संयुक्त छनोटको तयारीका लागि महत्त्वपूर्ण हुनेछ । छनोट प्रतियोगिता असोज २२ गते देखि ओमानमा सुरू हुने छ ।
