काठमाडौं । एन्फा महिला लिगमा लगातार चार खेल जित्दै चर्च ब्वाइज युनाईटेडले मुख्य ड्रमा लगभग स्थान पक्का गरेको छ ।
शनिबार सम्पन्न खेलमा चर्च ब्वाइज युनाईटेडले सिन्धुपाल्चोक एफसीलाई ७-१ गोलको फराकिलो अन्तरले पराजित गरेको हो । यससँगै समूह 'ए'को शीर्ष स्थानमा रहेको चर्चले बाँकी २ मध्ये १ खेलमा बराबरी नतिजा हात हात पार्न सके महिला लिगमा स्थान पक्का गर्ने छ ।
उसलाई अघिल्लो चरणमा पुग्न मात्र एक अंक आवश्यक छ । च्यासल मैदानमा चर्च ब्वाइजलाई जित दिलाउन वर्षा ओली, मनिता तुमरोक र सुजाता पालुङवाले ब्रेस पुरा गर्दा र संगीता बिकले १-१ गोलको योगदान दिए ।
मनिताले खेलको छैठौं मिनेटमा गोल गर्दै चर्चलाई सुरूवाती अग्रता दिलाएकी थिइन् । त्यसको चार मिनेटपछि वर्षाले गोल गर्दै अग्रता दोब्बर पारिन् । १९औं मिनेटमा सुजाता र २७ औं मिनेटमा संगीताले गोल गरेपछि चर्च ब्वाइजले पहिलो हाफमा ४-० को अग्रता बनाएको थियो ।
दोस्रो हाफको सुरूवातमै अनु भुसालले गोल गर्दै सिन्धुपाल्चोकलाई खेलमा फर्काउने प्रयास गरेकी थिइन् । ५३औं मिनेटमा सुजाताले व्यक्तिगत दोस्रो गोल गर्दै ब्रेस पुरा गरिन् । ८४ औं मिनेटमा वर्षा र त्यसको २ मिनेटपछि संगिताले गोल गरेपछि चर्चले ७-१ को एकतर्फी जित हात पारेको हो ।
जितसँगै चार खेलमा १२ अंक जोडेको चर्च ब्वाइजले महिला लिग लगभग स्थान पक्का गरेको छ । उ समूह 'ए'को शीर्ष स्थानमा छ । आजै सम्पन्न अर्को खेलमा न्युरोड टिम एनआरटीले नेपाल वेस्ट म्यानेजमेन्ट टिमलाई ७-० को फराकिलो अन्तरले पराजित गर्यो ।
