परासी । पूर्व पश्चिम राजमार्गअन्तर्गत पूर्वी नवलपरासीको दाउन्नेमा बालुवा बोकेको टिपरको पट्टा भाँचिदा अवरुद्ध भएको सडक अहिले एकतर्फी सञ्चालनमा आएकाे छ ।
विनय त्रिवेणी गाउँपालिका २ घ्यू खोला नजिकै लु २ ख ४२५ नम्बरको टिपर बिग्रिँदा तीन घन्टा सम्म सडक अवरुद्ध हुँदा यातायात प्रभावित भएपनि अहिले केही सहज हुँदै गएको जिल्ला प्रहरी कार्यालय पुर्वी नवलपरासीले जनाएको छ ।
तीन घन्टा सडक अवरुद्ध हुँदाको परेको प्रभावका कारण सवारीको लामो लाइन लागेको छ । पूर्वतर्फ दुम्किबास र पश्चिमतर्फ बर्दघाटमा यात्रुहरू रोकिनु परेको छ ।
सडक बिस्तारको क्रममा रहेको यस सडक खन्डमा पहाड काट्ने, कल्भर्ट निर्माण जस्ता कामले हरेक दिन सवारी जाम हुने गरेको छ । साँघुरो सडकमा एउटा सवारी बिग्रिँदा पनि जाम हुने समस्याले यात्रुले सास्ती पाएका छ्न । सडकको अवस्था जीर्ण हुँदा दाउन्ने खण्डको १४ किलोमटर दूरी पार गर्न २ देखि ३ घन्टा लाग्ने गरेको छ ।
