काठमाडौं । इंग्लिस प्रिमियर लिग अन्तर्गत गए राति भएको खेलमा चेल्सी पराजित भएको छ । एक गोलको अग्रता बचाउन नसक्दा चेल्सीले फुलहाम विरुद्ध हार बेहोरेको हो ।
चेल्सीको स्टामफर्ड ब्रिजमा भएको खेलमा घरेलु समर्थकमाझ एक गोलको अग्रता जोगाउन नसकेपछि दोस्रो हाफको अन्तिममा दुई गोल बेहोर्दै चेल्सी पराजित भएको हो । खेलको १६औं मिनेटमा नै कोल पाल्मरले अग्रता बनाएका थिए । तर, फुलहामले खेलको ८२औं मिनेटमा र इन्ज्युरी समयमा गोल फर्काएर जित दर्ता गरेको हो । यता, फुलहामले भने चेल्सीको मैदानमा १८ खेलपछि जित दर्ता गरेको हो । यसअघिका १७ खेलमा फुलहाम ११ पटक पराजित भएको थियो भने ६ खेल बराबरीमा सकिएका थिए ।
फुलहामले सन् १९७९ पछि चेल्सीलाई घरेलु मैदानमा हराएको हो । फुलहामलाई जिताउने क्रममा रोड्रिगो मुनिजसुले खेलको ९५औं मिनेटमा गोल गरेका थिए । सन् २००३ पछि चेल्सीले घरेलु मैदानमा ९० मिनेटपछि गोल बेहोरेर हारेको यो पहिलो पटक हो ।
गए राति नै भएको खेलमा प्रिमियर लिग क्लब म्यानचेस्टर युनाइटेड पनि वुल्भरह्याम्पटनसँग अवे मैदानमा पराजित भएको छ ।
