एसीसी मेन्स प्रिमियर कप : १४३ रनले यूएई विजयी

काठमाडौं । यूएईले एसीसी मेन्स प्रिमियर कपमा विजयी सुरुवात गरेको छ । यूएईले आफ्नो पहिलो खेलमा कुवेतलाई १४३ रनले हरायो ।

त्रिवि मैदानमा टस जितेर पहिले ब्याटिङमा आएको यूएईले ५० ओभरमा ६ विकेटको क्षतिमा ३७१ रन बनायो । भृत्या अरविन्द र रोहन मुस्तफाले शतकीय इनिङ्स खेले टिमलाई विशाल योगफलतिर डोहोराएका हुन् । यूएईले सुरुवात भने राम्रो गर्न सकेन । ओपनर मोहमद वासिम ८ र आर्यन लाक्रा शून्य रनमा पेभेलियन फर्किए । ९ रन बनाएका रमिज सहजाद पाँचौं ओभरमा आउट भए । २४ रन जोड्दा तीन विकेट गुमाएको यूएईको पारी भृत्या र रोहनले २७५ रनको विशाल साझेदारीसहित बलियो स्थितिमा पुर्याए ।

११८ रन बनाएका रोहन चौथो विकेटका रुपमा आउट भए । ५०औं ओभरमा आउट भएका भृत्या दोहोरो शतकबाट १५ रन टाढा रहे । उनले १८५ रन बनाउन १७ चौका र ९ छक्का हिर्काए । आसिफ खानले ९ बलमा ३० रन जोडे । साहरुख कुडुस र प्रभिन्दर कुमारले दुई-दुई विकेट लिए ।

जवाफमा उत्रिएको कुवेतले ३६ दशमलव तीन ओभरमा २२८ रन मात्रै बनाउन सक्यो । कुवेतका लागि परबिन्द्र कुमार र सायद मोइबले अर्धशतकीय पारी खेले पनि टिमको हार भने टार्न सकेनन् । कुमारले २६ बलमा ५३ रन बनाएका थिए । मोनिबले पाँच चौका र ६ छक्काको मद्दतमा ३६ बलमा ६८ रन जोडे । कप्तान मोहम्मद अस्लाम ३३ रनमा पेभेलियन फर्किए । जुनाइद सिद्दिकी र कार्तिक मियाप्पनले तीन-तीन विकेट हात पारे ।