काठमाडौं । उपप्रधानमन्त्री एवं शहरी विकासमन्त्री प्रकाशमान सिंहले संविधान संशोधनमा ध्यान केन्द्रित गर्नुपर्ने बताउनुभएको छ ।
बुधबार नेपाली कांग्रेस आपूर्ति तथा उपभोक्ता विभागले आयोजना गरेको दैनिक उपभोग्य वस्तुको सुनिश्चितताः उपभोक्ताको अधिकार हाम्रो चासो विषयक अन्तरसंवाद कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले संविधानमा रहेका अफ्ठ्याराहरू फुकाउन विधि र प्रक्रियामार्फत अघि बढ्ने बताउनु भयो । उहाँले सरकार बन्दाखेरि नै सात बुँदे सहमतिमा संविधान संशोधनको विषय प्राथमिकतामा रहेको बताउनु भयो ।
संविधान बनेको एक दशक भएको र निर्वाचन पनि भइसकेको अवस्थालाई मध्यनजर गरी अफ्ठ्याराहरू फुकाउनुपर्ने उहाँकाे भनाइ छ । उपप्रधानमन्त्री सिंहले प्राप्त उपलब्धिको रक्षाका लागि सबै एक हुनुपर्ने बताउनु भयो ।
