हेटाैँडा । बागमती प्रदेशका मुख्यमन्त्री इन्द्रबहादुर बानियाँले आफ्नो नेतृत्वको सरकार गरिब जनताको भएको बताउनुभएको छ ।
बुधबारको प्रदेशसभामा बैठकलाई सम्बोधन गर्नुहुँदै मुख्यमन्त्री बानियाँले गरिब जनताप्रति सरकार जिम्मेवार भएर लाग्नेसमेत प्रष्ट पार्नुभयो । सुशासन, पारदर्शी र जवाफदेही सरकारको मुख्य उद्देश्य भएको दाबी गर्दै उहाँले विगतका सरकारहरूले गरेका राम्रा कामलाई आफ्नो सरकारले निरन्तरता दिने बताउनुभयो ।
विपद्को कारण भएका क्षतिहरूलाई कार्यतालिका नै बनाएर पुनर्निमाण गर्ने समेत उहाँले प्रतिबद्धता व्यक्त गर्नुभयो । मुख्यमन्त्री बानियाँले संघ र स्थानीय सरकारसँग समन्वय गरेर विपद्बाट बासस्थान गुमाएकाहरूलाई तत्काल पुनर्वासको व्यवस्था गरिने समेत बताउनुभयो ।
हरेक दिन, हरेक हप्ता, हरेक महिना जनताले महसुश गर्ने गरी तथ्याङ्कको आधारमा काम गर्ने समेत उहाँले उल्लेख गर्नुभयो । मुख्यमन्त्री बानियाँले सुशासन र पारदर्शीताको नमुना मुख्यमन्त्री कार्यालय र निवासबाट सुरू गरिने बताउनुभयो ।
विगतका मुख्यमन्त्रीहरूले कार्यालय र निवासमा गरेको खर्चमा ५० प्रतिशत कटौती गर्ने समेत उहाँले उद्घोष गर्नुभयो । प्रदेशसभा बैठकमा मुख्यमन्त्री बानियाँले महालेखा परीक्षकको कार्यालयबाट प्राप्त आर्थिक वर्ष २०८१/८२ को प्रतिवेदन प्रस्तुत गर्नुभएको थियो ।
