काठमाडौं । नवनियुक्त प्रधानमन्त्री केपी शर्मा ओली आजै मन्त्रिपरिषद् विस्तार गर्ने तयारीमा हुनुहुन्छ ।
नेकपा एमाले र नेपाली कांग्रेसका नेताहरू मन्त्रीको टुंगो लगाउने गृहकार्यमा आज बिहानै देखि जुटेका हुन् । एमालेले आफ्नो भागका ८ मन्त्रीको नाम टुंग्याएको छ भने कांग्रेसको आन्तरिक छलफल चलिरहेको छ ।
एमालेबाट विष्णु पौडेल उपप्रधानमन्त्रीसहित अर्थमन्त्री बन्नु भएको छ । यस्तै सञ्चार तथा सूचना प्रविधिमन्त्री पृथ्वी सुब्बा गुरुङ, भौतिक पूर्वाधार तथा यातायातमन्त्री देवेन्द्र दाहाल र शिक्षामन्त्री विद्या भट्टराई बन्नु भएको छ ।
यस्तै रक्षा मन्त्रालयको जिम्मेवारी मानवीर राईले पाउनु भएको छ भने राजकुमार गुप्तालाई सङ्घीय मामिला तथा सामान्य प्रशासन मन्त्रालयको जिम्मेवारी दिइएको छ ।
यस्तै गरी बलराम अधिकारी एमालेबाट भूमि व्यवस्था, सहकारी तथा गरिबी निवारण मन्त्री बन्नु भएको हो भने दामोदर भण्डारीले उद्योग, वाणिज्य तथा आपूर्ति मन्त्रालयको जिम्मेवारी पाउनु भएको छ ।
