काठमाडौं । विराटनगरमा जारी नेकपा एमाले कोशी प्रदेश कमिटीको अधिवेशनमा नेतृत्व चयन लागि आइतबार मात्रै मतदान हुने भएको छ ।
कोशी प्रदेश निर्वाचन कमिटीले शनिबार कार्यक्रम तालिका सार्वजनिक गरी आइतबार बिहान ११ बजेदेखि बेलुका ४ बजेसम्म मतदान हुने जानकारी दिएको हो ।
उक्त कार्य तालिकाअनुसार आइतबार बिहान ७ बजेसम्म उम्मेद्वारहरुले नाम फिर्ता लिन सक्नेछन् भने ७ : १५ मा उम्मेद्वारको अन्तिम नामावली प्रकाशन गरिनेछ ।
निर्वाचन तालिकाअनुसार शनिबार बेलुका साढे ५ बजे प्राम्भिक नामावली प्रकाशन गरिनेछ । साढे ६ बजेसम्म उम्मेदवारको विरोधमा उजुरी दिने समय छुट्याइएको छ भने बेलुकी ७ बजे उम्मेदवारको नामावली पुन: प्रकाशन गरिनेछ । यसपछि भोलि (आइतबार) बिहान ७ बजेसम्म उम्मेदवारले नाम फिर्ता लिन समय दिइएको छ ।
पार्टी अध्यक्ष केपी शर्मा ओलीले सहमतिबाटै नेतृत्व चयन गर्न जोडबल गरेका छन् । यस अधिवेशनबाट पाँच पदाधिकारीसहित २१५ सदस्यीय प्रदेश कमिटी गठन हुनेछ ।
