काठमाडौं । प्रतिनिधिसभाअन्तर्गतको अर्थ समितिका सभापति सन्तोष चालिसेले समितिले सरकारलाई दिएका ८० प्रतिशत निर्देशन कार्यान्वयन नभएको जानकारी दिएका छन् ।
अर्थ समितिको शुक्रबारको बैठकमा बोल्दै सभापति चालिसेले यसरी समितिले दिएको निर्देशन सरकारले कार्यान्वयन नगरे बैठक बस्नुको कुनै औचित्य नहुने जिकिर गरे ।
चालिसेले भने, ‘८० प्रतिशत समितिका निर्देशन सरकारले पालना गर्दैन भने समितिको बैठक मात्रै बसेर नकारात्मक सन्देश गयो । सरकारले समितिको निर्देशन पालना नगरे समितिको बैठक बस्दैनौं ।’
समितिको निर्देशन सरकारले कार्यान्वयन नगर्दा भत्ता लिनकै लागि मात्र बैठक बसे जस्तो नकारात्मक सन्देश जाने उनको भनाइ छ ।
समितिले अहिलेसम्म दिएका निर्देशन पालना नभएको र सरकारले गरेका निर्णय कार्यान्वयनको विषयमा समितिले व्यापक छलफल गरी अनुगमनको आवश्यकता रहेको उनले औल्याए ।
