स्काउटभित्रको बेथिती अन्त्य र शुद्धीकरणको माग गर्दै स्काउटरहरू ७ दिनदेखि आमरण अनसनमा

काठमाडौं । नेपाल स्काउटभित्रको बेथिती अन्त्य र शुद्धीकरणको माग गर्दै स्काउटर देवदूत अधिकारी र पवन गुरुङ ७ दिनदेखि आमरण अनसनमा बस्नुभएको छ । उहाँहरूको स्वास्थ्य अवस्थासमेत कमजोर बनेको छ ।

स्काउटमा भएको भ्रष्टाचार तथा अनियमितता छानबिनका लागि पटक-पटक ध्यानाकर्षण र माग गर्दासमेत सम्वोधन नभएपछि बाध्य भएर अनसनमा बस्नु परेको उहाँहरूको भनाइ छ । अनियमिततामा संलग्न पदाधिकारीलाई निलम्बन नगरेसम्म अनसन जारी राख्ने चेतावनी उहाँहरूको छ । अनसनरत दुवै जनाको स्वास्थ्य अवस्था कमजोर बनेको छ ।

युवा तथा खेलकुद मन्त्री तेजुलाल चौधरीले हस्तक्षेप गरी स्काउटका निर्वाचित प्रमुख आयुक्तलाई बखास्त गरी आफू अनुकूलका व्यक्ति नियुक्त गरेपछि पनि विवाद चुलिएको छ । सरकार र आन्दोलनरत पक्षबीच भएको वार्ता निष्कर्षमा पुग्न सकेको छैन ।