पाल्पा । पाल्पाका अधिकांश स्थानमा लगाइएका धान खेतीमा हृवाइट फ्लाई, कालो पोके, फड्के, डडुवा रोगका कारण किसान समस्यामा छन् ।
प्राविधिक ज्ञानको अभावमा जथाभावी बीउ प्रयोग गर्ने, रासायनिक मलको अत्यधिक प्रयोग गर्दा विभिन्न खालका रोगको सामना गर्नु परेको कृषि प्राविधिकले बताएका छन् ।
पाल्पाका अधिकांश स्थानमा डढुवा, पोके रोग, झ्याउरो भएर नबढ्ने जस्ता समस्या देखिएको रामपुर नगरपालिका ५ का किसान नारायण भण्डारीले जानकारी दिनुभयो । रोगबाट बच्न समयमा कृषि प्राविधिक सेवा नपाउने, रोग लागिसकेपछि नियन्त्रण गर्न नसक्दा थप समस्या भएको किसानले बताएका छन् ।
किसानका अनुसार धानको फुल खेल्ने बेलामा आएको झरीले फुल झारेकाले धानमा बाला लागे पनि भरिलो भएको छैन । पाल्पामा अघिल्लो वर्ष ३० हजार एक सय मेट्रिक टन धान उत्पादन भएको थियो ।
पाल्पाको माडीफाँट, रामपुरफाँट, पूर्वखोला, झडेवा, अर्गली, कचल लगायतका फाँटमा धान खेती गरिन्छ ।
