काठमाडौं । निर्वाचन आयोगले दल तथा उम्मेदवारलाई निर्वाचन प्रचारप्रसार गर्दाको खर्चको विवरण सार्वजनिक गरेर आयोगमा पेस गर्न निर्देशन दिएको छ ।
आयोगले विज्ञप्ति जारी गरी दल तथा उम्मेदवारलाई ३५ दिनभित्र आफूले गरेको खर्च विवरण सार्वजनिक गरी आयोगमा बुझाउन निर्देशन दिएको हो । आयोगले बुधबारदेखि लागू हुनेगरी दल तथा उम्मेदवालाई निर्देशन गरेको छ ।
प्रत्यक्षतर्फको उम्मेदवारले सम्बन्धित निर्वाचन कार्यालयमा र समानुपातिकका लागि दलले आयोगलाई बुझाउनुपर्नेछ । उम्मेदवारले आफ्नो जिल्लामा रहेको निर्वाचन कार्यालयको सूचना पाटी, सम्बन्धित स्थानीय तहका कार्यालयको सूचना पाटी र आमसञ्चार माध्यम वा सामाजिक सञ्जाललगायतबाट सार्वजनिक गर्नुपर्ने छ।
