सिन्धुपाल्चोक । लोकतान्त्रिक अभ्यासको महत्वपूर्ण दिन प्रतिनिधि सभाको मतदानमा बिहीबार सिन्धुपाल्चोकका बहुअपाङ्गता, अपाङ्गता र जेष्ठ नागारिक मतदाता उत्साहपूर्वक सहभागी भएका छन्।
बिहानैदेखि उनीहरू आ-आफ्नो मतदान केन्द्रमा पुगेर ज्येष्ठ नागरिकहरू आफन्तको सहयोगमा र अपाङ्गता भएका मतदाताहरू ह्वीलचियरको सहायतामा मतदानस्थलसम्म पुगेर सहज वातावरणमा आफ्नो मतअधिकार प्रयोग गरी खुसीले फर्केका छन् ।
सिन्धुपाल्चोक चौतारा साागाचोकगढी नगरपालिका-५ स्थित श्री कृष्ण रत्नगंगा माध्यमिक विद्यालयमा रहेको मतदान केन्द्रमा बहुअपाङ्गता भएका ३० वर्षीय सिर्जन श्रेष्ठले मतदान गर्नुभएको छ । चारै हातखुट्टा अपाङ्गता भएका श्रेष्ठ बोल्न सक्नुहुन्न। तर शारीरिक सीमितताका बाबजुद पनि उहाँले आफ्नो मताधिकार प्रयोग गर्नु भएको छ ।
अपाङ्गमैत्री रहेको मतदान केन्द्रमा कुनै झन्झट बेहोर्नु परेन । चौताराका अमर घले पनि मतदान गरेर फर्किनुभएको छ । बैसाखीको सहारामा मतदान केन्द्र पुग्नुभएका घलेले यसपटक सहज रूपमा मतदान गर्न पाउनुु भयो । अघिल्ला निर्वाचनहरूमा मतदान केन्द्र अपाङ्गमैत्री नहुँदा निकै समस्या भोग्नुपरेको थियो ।
मतदान गर्न पुग्न र प्रक्रिया पूरा गर्न धेरै कठिनाइ हुन्थ्यो। तर यसपटक भने मतदान केन्द्रमा अपाङ्गता भएका मतदाताका लागि सहज पहुँच, सहयोगी वातावरण र आवश्यक व्यवस्थाका कारण आफूले बिना झन्झट मतदान गरेर फर्किन पाउँदा घले निकै खुसी देखिनुभएको छ।
अपांगत भएका व्यक्तिसँगै सिन्धुपाल्चोकका जेष्ठ नागारिकमा पनि मतदानस्थलमा चुनावको रौनक देखिन्छ । जिल्लाभरको मतदान केन्द्रहरूमा अपाङ्गता भएका तथा ज्येष्ठ नागरिकका लागि छुट्टै लाइनको व्यवस्था गरिएकाले सहज रूपमा मतदान गर्न पाएका हुन् ।
मतदान केन्द्रहरूमा सुरक्षाकर्मी र स्वयंसेवकको सहयोगमा व्यवस्थित र सहज वातावरणमा मतदान भइरहेको छ। कोही आफन्तको सहयोगमा त कोही आफैं मतदान प्रक्रियामा सहभागी भएका छन् । शारीरिक अवस्था जस्तोसुकै भए पनि नागरिकले आफ्नो मताधिकार प्रयोग गर्न पाउने अधिकार र अवसर सुनिश्चित गर्नुपर्ने सन्देश सिन्धुपाल्चोकको मतदानस्थलहरुको दिएको छ।
