काठमाडौं । राष्ट्रिय स्वतन्त्र पार्टी-रास्वपाका वरिष्ठ नेता बालेन्द्र शाह पहिलो पटक पार्टीको केन्द्रीय कार्यालय पुग्नुभएको छ ।
आइतबार दिउँसो तामझामसहित वनस्थलीस्थित पार्टी कार्यालयमा प्रवेश गर्नुभएका शाहलाई रास्वपाका नेता तथा कार्यकर्ताहरूले उत्साहपूर्वक स्वागत गरेका हुन् । रास्वपामा वरिष्ठ नेताको रूपमा समाहित भए यता उहाँको यो पहिलो औपचारिक कार्यालय भ्रमण हो ।
उहाँ आजै बस्ने रास्वपाको केन्द्रीय समिति बैठकमा सहभागी हुन कार्यालय पुग्नुभएको हो । गत पुसमा रास्वपासँग ७ बुँदे सहमति गर्दै पार्टीमा समाहित हुनुभएका शाहलाई आगामी निर्वाचनमा प्रधानमन्त्रीको उम्मेदवारका रूपमा अघि सारिने घोषणा गरिएको छ ।
