जनकपुर । शीतलहरका कारण अत्यधिक चिसोले अस्तव्यस्त बनेको जनकपुरलगायतका क्षेत्रमा सोमबार घाम लागेपछि सर्वसाधारणले निकै राहत महसुस गरेका छन् ।
विगत ४ सातापछि सोमबार बिहानै ७ बजे घाम लागेपछि शीतलहर, कुहिरो र हुस्सुका कारण अत्तिनै पिडित बनेका मधेशका सर्वसाधारणले राहत महसुस गरेका हुन् । चिसो र जाडोले व्यापक समस्या पारेको बेला जनकपुर र सो वरिपरि पारिलो घाम लागेकोले जनजीवन चलायमान बनेको छ।
स्थानीयले घाम लागेसँगै नुहाउने र लुगा धोएर सुकाउने काम गरेका छन् । शितलहरका कारण विशेषगरी वृद्धवृद्धा, बालबालिका, सुत्केरी महिला र दैनिक ज्याला मजदुरी गर्ने सबभन्दा बढी प्रभावित भएका छन् । लगातार चार साताको शीतलहर र अत्याधिक चिसोका कारण घाम लाग्न नसकेपछि मानिस मात्र नभइ बोट बिरुवा, पशुपन्छी र कृषिजन्य वस्तु समेत नराम्ररी प्रभावित भएको हो ।
१५ वर्षपछि यस वर्ष धेरै दिनसम्म लगातार शीतलहर चल्नुका साथै घाम नलाग्ने सम्मका समस्या देखिएको हो । यसकारण सडकमा यातायातका सवारीसाधन र हवाई उडान समेत प्रभावित बनेको थियो ।
