काठमाडौं । नेपाली कांग्रेसको दोस्रो विशेष महाधिवेशनअन्तर्गत बन्दसत्र सुरू भएको छ । भृकुटीमण्डपमा आइतबारबाट सुरू भएको विशेष महाधिवेशन साेमबारबाट बन्दसत्र चरणमा प्रवेश गरेको हो ।
भृकुटीमण्डपमा जारी कांग्रेसको विशेष महाधिवेशनमा महामन्त्री विश्वप्रकाश शर्माले राजनीतिक प्रतिवेदन पेस गर्दै हुनुहुन्छ । बन्द सत्रमा महामन्त्रीद्वय गगन थापाले पनि प्रतिवेदन पेस गर्नुहुनेछ । बन्द सत्रमा छलफलका लागि प्रदेशस्तरीय ७ तथा विदेशस्थित जनसम्पर्क समिति र भ्रातृसंस्था गरी ९ वटा समूह बनाइने छ ।
विधान संशोधनका लागि समिति बनाइने र विधानमै संशोधन गर्ने वा पछि गर्ने गरी संकल्प प्रस्ताव पारित गर्ने विषयमा पनि बन्द सत्रले नै निर्णय गर्ने बताइएको छ । समूहगत छलफल गरेर चार वटा विषयमाथि नीति मन्थन हुनेछ। चार विषयहरू मध्ये विधान संशोधन, नीति र नेतृत्व, शासकीय सुधार र समसामयिक विषयमाथि बृहत् छलफल हुने छ ।
नीति मन्थनपछि नेतृत्व परिवर्तन गर्ने या नगर्ने भन्नेबारे बृहत् छलफल हुनेछ । यदि नेतृत्व परिवर्तनको पक्षमा निर्णय भएमा निर्वाचन समिति गठन गरी थप प्रक्रिया बढाइने विशेष महाधिवेशन प्रचारप्रसार समितिले जनाएको छ । विशेष महाधिवेशनमा प्रतिनिधिको संख्या केहीबेर अघिसम्म २८ सय नाघेको छ।
साेमबार थप दुई सय जना प्रतिनिधिहरूले नाम दर्ता गराएका हुन् । आइतबार उद्घाटन सत्र चल्दा साँझसम्म दुई हजार ६६२ प्रतिनिधिले नाम दर्ता गराएका थिए।
