काठमाडौं । सरकारले विदेशमा बस्ने नेपाली नागरिकलाई मतदानको अधिकार दिने गरी अध्यादेश अघि बढाएको छ ।
कानुन मन्त्रालयले अध्यादेशको मस्यौदालाई अन्तिम रूप दिएर गृह मन्त्रालयमा पठाएको हो । अब गृहले यसलाई निर्णयका लागि मन्त्रिपरिषद्मा पठाउनेछ । यसअघि गृहले अध्यादेशको प्रारम्भिक मस्यौदालाई अन्तिम रूप दिन गत कात्तिक तेस्रो साता कानुन मन्त्रालयमा पठाएको थियो ।
अध्यादेशमार्फत ४ वटा कानुन संशोधन गर्न खोजिएको छ, जसमा विदेशमा बस्ने नेपाली नागरिकलाई मतदानको अधिकार दिन सकिने व्यवस्था गरिएको छ । मतदानस्थल सरकार र आयोगको समन्वयमा गर्ने व्यवस्था राखिएको छ । मतदाता नामावली संकलन र मतगणना लगायतका व्यवस्था नियमावलीले गर्न सक्ने गरी आवश्यक प्रबन्ध गर्ने व्यवस्था गरिएको छ ।
अन्तर निर्वाचन क्षेत्रका मतदातालाई मतदान दिने व्यवस्था पनि यसै अध्यादेशमार्फत गरिएको छ भने निर्वाचन कसुर भएमा नेपालकै कानुन बमोजिम कारबाही हुने व्यवस्था गरिएको छ । त्यसैगरी मतपत्रमा उम्मेदवारलाई अस्वीकारको व्यवस्था अर्थात् 'राइट टु रिजेक्ट' को व्यवस्था समेत गरिएको छ ।
