अर्घाखाँची । गाईले दूध दिन छाडेपछि वा उमेर बढेपछि बजारतिर लगेर बेवारिसे छोडिदिने प्रवृत्ति बढेको छ ।
पाल्न नसक्ने बाहना बनाएर गाईगोरू तथा बाच्छाबाच्छी छाडा छोडिदिने प्रवृत्तिले तिनको व्यवस्थापन चुनौतीपूर्ण बनेको छ । यस्तोमा अर्घाखाँचीको सन्धिखर्कका नारायण खनालले आफ्नै स्रोतसाधनमा गौशाला निर्माण गरी छाडा चौपायाको संरक्षणमा जुट्नुभएको छ ।
प्राकृतिक मनोरम वातावरणमा वरिपरी हरियाली र चरन क्षेत्रसमेत पर्याप्त भएको नरपानीमा २०७१ सालदेखि श्रीकृष्ण गौशाला निर्माण गरी जिल्लाभर छाडिएका झन्डै एक सय ५० भन्दा बढी गाईहरू राखिएको छ । सो क्षेत्रमा घाँसको कमि हुन नदिन डाँले घास पनि रोप्न थालिएको छ । नारायण खनालको सत्कर्मका कारण बालीनाली खाएको निहुँमा स्थानीयले निर्ममतापूर्वक कुटेर घाइते भएका पशुचौपायाको संरक्षणमा ठूलो सहयोग मिलेको छ ।
अर्घाखाँचीलाई छाडा चौपायामुक्त बनाउन १० वर्षदेखि वार्षिक १५ लाख रूपैयाँ लगानी गरेर सडकमा दुःख पाएका गाईहरूको संरक्षणमा लागेको नारायण खनाल बताउनुहुन्छ । गौशालाको संक्षणमा पछिल्लो समयमा स्थानीय तहले पनि चासो देखाएको छ । गौशालामा गाई बढ्न थालेपछि खानेपानीको व्यवस्थापन, टहरा निर्माण, पराल खरिदमा केही सहयोग गर्न थालेका छन् ।
गौशाला बनाएर छाडा पशु चौपायाको व्यवस्थापन गर्न लागिपरेका खनाललाई गाईको संख्या थपिँदै गएकाले खुवाउने पर्याप्त घाँस, दानापानी जुटाउन भार थपिँदै गएको छ । यस्तोमा उहाँले मनकारी दाताहरूसँग सरकारले पनि साझेदारी गरिदिनुपर्ने उहाँको अपेक्षा छ ।
.png&w=400&height=300)
