काठमाडौं । जेन-जी आन्दोलनपछिको आगजनीका बावजूद पनि नेपालले सार्वभौम क्रेडिट रेटिङमा गत वर्षजस्तै बीबी माइनस प्राप्त गरेको छ ।
सामाजिक-राजनीतिक चुनौती, वर्षाजन्य प्राकृतिक विपत्ति र विश्वव्यापी आर्थिक सुस्तताका बीचमा पनि नेपालले गत वर्षजस्तै रेटिङ पाएको हो । बीबी माइनस पाउनुले नेपालको दीर्घकालीन दायित्वहरू पूरा गर्ने क्षमता गत वर्षजस्तै रहेको र समष्टिगत आर्थिक स्थायित्व स्थिर र बलियो रहेको देखिएको अर्थ मन्त्रालयले जनाएको छ ।
नेपालले प्राप्त गरेको यो रेटिङले मुलुकभित्र स्थिर तथा सकारात्मक आर्थिक आधार तयार हुँदै गएको सरकारको भनाइ छ । यो रेटिङले मुलुकभित्र वैदेशिक लगानी बढाउन, अन्तर्राष्ट्रिय विकास साझेदारहरूसँग सहकार्य विस्तार गर्न र नेपालले आफ्नो सार्वभौम ऋण जारी गर्दा आवश्यक पर्ने स्थिर क्रेडिट प्रोफाइल कायम राख्न मद्दत पुर्याउने अर्थ मन्त्रालयको भनाइ छ ।
ऊर्जा, पूर्वाधार, पर्यटन, कृषि र डिजिटल अर्थतन्त्रमा हुने दीर्घकालीन लगानी आकर्षणका लागि यो सूचक महत्वपूर्ण हुने अर्थ मन्त्रालयको भनाइ छ ।
