काठमाडौं । विदेशमा रहेका नेपाली र देशभित्रै भएर पनि भोट गर्न नपाउनेहरूलाई मतदानको अधिकार कसरी दिने भन्नेबारे नीति अनुसन्धान प्रतिष्ठानले अध्ययन सुरू गरेको छ ।
सरकारले प्रवासी नेपाली र नेपालमै रहेर पनि आफ्नो मतदान केन्द्र जान नपाउनेलाई भोट हाल्ने अधिकार दिनेबारे अध्ययन गर्न प्रतिष्ठानलाई जिम्मा दिएको हो । प्रतिष्ठानका अध्यक्ष लेखनाथ शर्माले सरकारले पत्र पठाएको र अध्ययन पनि सुरू भएको जानकारी दिनुभयो।
छोटो समय भएकोले केही दिनपछि सरकारलाई सुझाव दिइने अध्यक्ष शर्माले बताउनुभयो । विदेशमा रहेका नेपालीलाई मताधिकार दिनुपर्ने माग बढ्दै गएको छ । निर्वाचन आयोगले सरकारले कानुन बनाइदिए विदेशमा रहेका नेपालीलाई आसन्न निर्वाचनमै मताधिकार दिन सकिने बताउँदै आएको छ ।
सरकारले फागुन २१ गते निर्वाचन गराउने जिम्मा पाएको छ ।
