काठमाडौं । केहि दिनयता सवारीधनीलाई इम्बोस्ड नम्बर प्लेट जडानको चटारो छ ।
इम्बोस्ड नम्बर प्लेट जडान नगरे जरिवाना गर्ने निर्णयबाट सरकार पछि त हटेको छ, तर जडान भने जारी छ । तर यातायात कार्यालयहरूमा नयाँ नम्बर प्लेट जडान सजिलो भने छैन । हाम्रा सहकर्मी विकास आचार्यले यातायात कार्यालयहरूको अवलोकन गरी तयार पारेको यो रिपोर्ट हेरौं ।
सरकारले असोज १ गतेबाट नयाँ सवारी दर्ता, नवीकरण लगायतका सेवा लिन यातायात कार्यालयहरू आउँदा इम्बोस्ड नम्बर प्लेट अनिवार्य जडान गर्ने भएको छ । त्यस्का लागि आवश्यक तयारी सरकारले गरिरहेको छ ।
सेवाग्राहीले सेवा लिन आउँदा कतिको समस्या झेल्नु परेको छ । कति समय खर्चिनु पर्छ त इम्बोस्ड जडान सम्बन्धी सेवा लिन । पूर्वाधारलगायत जनशक्तिको अवस्था कस्तो छ । आज हामी काठमाडौं उपत्यकाका केहि कार्यालयहरूको अवस्था देखाउँछौं ।
सरकारले सवारी साधनमा इम्बोस्ड नम्बर प्लेट जडान गर्न लगाउने नीति लिएपछि सेवाग्राही कार्यालयहरू धाउन थालेका छन् । दुईपाङ्ग्रे सवारी साधनको गुर्जुधारास्थित यातायात व्यवस्था कार्यालयले दैनिक करिब ३ सय मोटरसाईकल स्कुटरमा इम्बोस्ड नम्बर प्लेट जडान गरिरहेको छ । तर, त्यहाँ कर्मचारी छन् मात्र १० जना । कार्यालयको न आफ्नै भवन छ, न त सेवाग्राहीमैत्री व्यवस्थापन । सेवाग्राहीलाई अर्को डर छ- इम्बोस्ड जडान नगरे कारबाहीमा परिएला भन्ने ।
इम्बोस्ड जडानका लागि गुर्जुधारामा सेवाग्राहीले कम्तिमा ६ घन्टा खर्चिनुपर्छ । प्रशासनिक झन्झटले नागरिक दिक्क छन् । चारपाङ्ग्रे वा त्यसभन्दा माथिका सवारी साधनमा इम्बोस्ड नम्बर प्लेट जडान गर्न यातायात व्यवस्था कार्यालय एकान्तकुना पुग्नुपर्छ ।
इम्बोस्ड सम्बन्धी सेवा लिन यहाँ दैनिक करिब २ सय सेवाग्राही पुगिरहेका छन्। तर यो सेवा चलाउन यहाँ कर्मचारी छन् ४ जना । अझ झन्झटिलो त के छ भने एकै दिनमा एकान्तकुनाबाट सेवा पाईँदैन । एकान्तकुनाबाट इम्बोस्ड नम्बर प्लेट पाए पनि जडान गर्न टेकुको सवारी परीक्षण केन्द्र पुग्नुपर्छ । त्यहाँ पनि सेवाग्राहीले दुई दिन खर्चिनु पर्छ ।
सेवाग्राहीहरू घन्टैसम्म बसेर मात्रै चिट बोकेर घर फर्किनु पर्ने बाध्यता छ । सोहि दिन नम्बर प्लेट पाउँदैनन्, कुन दिन नम्बर प्लेट लिन बोलाउँछ टुंगो छैन् । यसरी सेवाग्राही घन्टौ सम्म बस्ने तर सेवा नपाउनेले गर्दा आजित छन् ।
सरकारले इम्बोस्ड नम्बर प्लेट जडानलाई मात्र प्राथामिकता दिएको छ । तर इम्बोस्ड नम्बर प्लेटमार्फत् सवारी निगरानीका लागि कुनै पूर्वाधार छैन । इम्बोस्ड नम्बर राखिए पनि सवारीधनिले नयाँ नम्बरबाट कर तिर्न पनि पाएका छैनन् । इम्बोस्ड जडान भएपनि पुरानै नम्बर प्रयोग गरेर कर तिर्नुपर्ने हुन्छ ।
