काठमाडौं । वर्ल्ड च्याम्पियनशिप अफ पब्लिक स्पिकिङको सेमिफाइनलमा पुग्न सफल पहिलो नेपाली संस्कृति आचार्यलाई अमेरिकाले प्रतियोगितामा सहभागी हुनका लागि भिसा दिन अस्वीकार गरेको छ । अमेरिकाको फिलाडेल्फियामा अगस्ट २० देखि हुन गइरहेको तीन दिने समारोहका लागि आचार्य छनोट हुनुभएको थियो ।
लाखौं प्रतिस्पर्धीमध्ये आचार्य विश्वभरिबाट छनोट भएका २८ मध्ये एक हुनुहुन्थ्यो । फाइनलमा पुगेर उपाधि जित्ने सम्भावना समेत भएकी आचार्य अहिले भने प्रतियोगितामा सहभागी नै हुन नपाएपछि निराश हुनुहुन्छ ।
उहाँको भिसा दुई पटकसम्म अस्वीकृत भएको छ । २२ वर्षीया आचार्यलाई कम उमेरको भएको, नेपालमा स्थायी जागिर नभएको तथा उहाँकी हजुरआमा अमेरिकामै भएकाले फर्किने सम्भावना नरहेको कारण देखाउँदै भिसा दिन अस्वीकार गरिएको उहाँले बताउनुभयो । "यसले हामी युवाहरूले भोगिरहेको समस्या र हाम्रा लागि आउने सीमितअवसरलाई समेत संकुचित पार्ने प्रवृत्ति उजागर गरेको छ", उहाँले भन्नुभयो ।
क्लब, क्षेत्र, जिल्ला तह हुँदै नेपाल, भारत, यूएई, बहराइन, बंगलादेश, भुटान, इराक, जोर्डन, कुवेत, लेबनान, प्यालेस्टाइन, कतार र ओमानको क्षेत्रीय विजेता समेत हुँदै आचार्य अमेरिकामा आयोजना हुने सेमिफाइनलमा छनोट हुनुभएको थियो । आचार्य कान्तिपुर टेलिभिजनको प्रशिक्षार्थी पत्रकार समेत हुनुहुन्छ ।
