काठमाडौं । शिक्षा, विज्ञान तथा सूचना प्रविधिमन्त्री रघुजी पन्तले नेपाललाई दक्षिण एसियामा नेत्र उपचारको केन्द्रको रूपमा विकास गर्नुपर्ने बताउनुभएको छ ।
प्रतिनिधि सभाको शुक्रबारको बैठकमा तिलगङ्गा विश्वविद्यालय सम्बन्धी विधेयकमाथिको सैद्धान्तिक छलफलमा बोल्दै मन्त्री पन्तले यस्तो बताउनुभएको हो । नेपाललाई दक्षिण एसियाको आँखा उपचार केन्द्रको रूपमा विकास गर्न विधेयकले महत्वपूर्ण भूमिका खेल्ने उहाँले बताउनु भयो । उहाँले नेपालमा हुने आँखा उपचार अन्य देशहरूभन्दा छरितो, सरल, सहज र विश्वसनीय मात्र नभई लागतको दृष्टिले पनि निकै सस्तो रहेको बताउनु भयो ।
नेपालको आँखा उपचार क्षमतालाई थप सुदृढ गर्दै नेपाललाई क्षेत्रीय नेत्र उपचार तथा अनुसन्धानको हब बनाउने लक्ष्यका साथ सरकारले काम गरिरहेको उहाँको भनाइ छ ।
