काठमाडौं । घुस मोलमोलाइसम्बन्धी प्रकरणमा मुछिएका संघीय मामिला तथा सामान्य प्रशासनमन्त्री राजकुमार गुप्ताले पदबाट राजीनामा दिनुभएको छ ।
मन्त्री गुप्ताले सामाजिक सञ्जालबाट राजीनामा दिएको सार्वजनिक गर्नुभएको हो । उहाँले प्रधानमन्त्रीसमक्ष राजीनामा बुझाउनुभएको छ ।
गुप्ताले विगत केही दिनदेखि निरन्तर आफ्नो नाममा घुस प्रकरणमा जोडेर प्रचार गरेको भन्दै कहिलेकाहीँ नखाएको विष पनि लाग्ने र आफू त्यसको सिकार भएको उल्लेख गर्नुभएको छ । लागेका आरोपको अनुसन्धान गरी सत्यतथ्य कुरा बाहिर ल्याउन सहयोग पुगोस् भनेर प्रधानमन्त्रीसमक्ष पदबाट राजीनामा गरेको उहाँको भनाइ छ ।
साथै मन्त्री गुप्ताले आफू प्रविधिको प्रयोगको सिकार भएकोसमेत दाबी गर्नुभएको छ । अब देश र जनताप्रति थप जिम्मेवारी बोधका साथ पार्टीले दिएको काम पूरा गर्ने प्रतिबद्धता सहित जनताको घरदैलोमा जाने उहाँले उल्लेख गर्नुभएको छ ।
यो प्रकरण सतहमा आएपछि मन्त्री गुप्तालाई प्रधानमन्त्री केपी शर्मा ओलीले बालुवाटारमा बोलाएर हिजो सोधपुछ गर्नुभएको थियो । भूमि आयोग कास्कीको अध्यक्ष बनाउन २५ लाख र मालपोत कार्यालय कास्कीको तत्कालीन प्रमुखको सरूवा रोक्न ५३ लाख घुस लेनदेनसम्बन्धी मोलमोलाई गरेको अडिओ सार्वजनिक भएको थियो ।
