काठमाडौं । अख्तियार दुरुपयोग अनुसन्धान आयोगले आज एकै दिन ६ वटा मुद्दा विशेष अदालतमा दर्ता गरेको छ ।
अख्तियारले काठमाडौं महानगरपालिका पूर्वइन्जिनीयर रामबाबु महतो कोइरीविरुद्ध ४ करोड ५८ लाख रुपैया गैरकानुनी सम्पत्ति आर्जन गरेको आरोपमा मुद्दा दायर गरेको हो । त्यस्तै रौतहटको फतुवा विजयपुर नगरपालिकाका तत्कालीन प्रमुख प्रशासकीय अधिकृत शम्भुकुमार यादव, जनसवाल राष्ट्रिय दैनिकका सम्पादक, तराई पोस्टका प्रतिनिधि र प्रकाशक समेत ५ जनाविरुद्ध गैरकानुनी लाभ तथा हानि पुर्याई भ्रष्टाचार गरेको आरोपमा मुद्दा दर्ता भएको छ ।
यस्तै पर्साको रामदेनी तिवारी निम्न माविका शिक्षक चन्देशकुमार चौहानले नक्कली शैक्षिक योग्यताको प्रमाणपत्र पेश गरेको आरोपमा मुद्दा दर्ता भएको छ ।
नेपाल बैंक लिमिटेड सञ्चालक समितिका तत्कालीन अध्यक्ष चन्द्रबहादुर अधिकारी लगायतलाई विभिन्न आयोजनामा ऋण सहजीकरण गरिदिने भन्दै घुस लिएर भ्रष्टाचार गरेको आरोपमा तीन वटा मुद्दा अख्तियारले दायर गरेको छ ।
यसअघि हिजो अख्तियारले नेपाल टेलिकमको बिलिङ सिस्टम अपग्रेड गर्दा भ्रष्टाचार भएको दाबीसहित विशेष अदालतमा मुद्दा दायर गरेको थियो ।
