काठमाडौं । सार्वजनिक लेखा समितिले पतञ्जली योगपीठको जग्गा सट्टापट्टामा भएको अनियमितता अनुसन्धानका लागि अख्तियार दुरुपयोग अनुसन्धान आयोगलाई निर्देशन दिने निर्णय गरेको छ । सार्वजनिक लेखा समितिको आज बसेको बैठकले पतञ्जली जग्गाबारे समितिमा परेको उजुरीका आधारमा हालसम्म गरेको अध्ययन र प्राप्त विवरणसहित अनुसन्धानका लागि अख्तियारमा पठाउने निर्णय गरेको हो ।
अघिल्लो वर्ष समितिमा पतञ्जली योगपीठको जग्गा सट्टापट्टामा अनियमितता भएको भन्दै उजुरी परेको थियो । जसमा समितिले सम्बन्धित निकायसँग कागजात मगाउने निर्णय गरेको थियो । यसबारे अनुसन्धान गरिरहेको अख्तियारलाई नै निर्देशन दिने निर्णय समितिले गरेको हो ।
यसअघि समितिको बैठकमा उजुरीबारे छलफल भइरहेका बेला सभापति ऋषिकेश पोखरेल र नेकपा माओवादी केन्द्रका सांसद अमनलाल मोदीबीच भनाभन भएको थियो । सभापति पोखरेलले विपक्षी दलका सांसदहरूलाई बोल्न नदिएको भन्दै आपत्ति जनाएपछि भनाभन भएको हो । समिति सभापति विपक्षी दलको हुनुपर्नेमा सत्तापक्षकै भएकाले समितिमा सरकारको छाया परेको र विपक्षीलाई बोल्न नदिएको आरोप सांसद मोदीको थियो ।
संसदीय समितिको हिजोको बैठकमा पनि सांसदहरूबीच भनाभन भएको थियो ।
