काठमाडौं । प्रधानन्यायाधीश प्रकाशमानसिंह राउतको टर्की भ्रमण स्थगित भएको छ ।
टर्कीमा बुधबार गएको ६ दशमलव २ म्याग्नेच्युडको भूकम्पका कारण प्रधानन्यायाधीश राउतको आजदेखि हुने भनिएको भ्रमण स्थगित भएको हो । टर्कीको संवैधानिक अदालतको ६३औं वार्षिकोत्सवका अवसरमा त्यहाँका प्रधानन्यायाधीशको मैत्रीपूर्ण निमन्त्रणमा प्रधानन्यायाधीश राउत भ्रमणमा जाने तय भएको थियो ।
तर, भूकम्प गएपछि अन्तिम समयमा भ्रमण स्थगित भएको सर्वोच्च अदालत स्रोतले जनाएको छ । प्रधानन्यायाधीश राउत विदेश भ्रमण जाने कार्यक्रम तय भएपछि गत आइतबारदेखि नियमित सुनुवाइ भइरहेको ५२ जनाको संवैधानिक नियुक्ति विवादसम्बन्धी रिटहरूमाथिको सुनुवाइको पेसी वैशाख २८ गतेका लागि तोकिएको थियो । आज प्रधानन्यायाधीशको इजलासमा कुनै पनि पेसी तोकिएको छैन ।
