काठमाडौं । काठमाडौं महानगरपालिकाले पूर्वराजा ज्ञानेन्द्र शाहलाई जरिवाना काटेको पत्र बुझाउन गएको महानगर प्रहरी बलको टोलीलाई निर्मल निवासको गेटबाटै फर्काइएको छ । शुक्रबार तीनकुनेमा राजावादी समूहको प्रदर्शनमा फोहोर गरेको सार्वजनिक संरचना तोडफोड गरेको भन्दै महानगरले ज्ञानेन्द्र शाहका नाममा ७ लाख ९३ हजार रुपैयाँ जरिवाना तोकेको थियो ।
शाहका नाममा महानगरले ८ वटा पत्र काटेको थियो । सोही पत्र बुझाउन गएको टोलीलाई गेटबाटै शाहको सचिवालयले फर्काएको हो ।
निर्मल निवासले महानगरको पत्र बुझ्न नमानेपछि काठमाडौं महानगर प्रहरी बलका प्रमुख राजुनाथ पाण्डेले अर्को प्रक्रियाबाट अघि बढ्ने जानकारी दिनुभएको छ । प्रमुख पाण्डेले हुलाकमार्फत पत्र पठाउने तयारी गरिएको पनि बताउनुभयो ।
