काठमाडौं । सभामुख देवराज घिमिरेले चालु अधिवेशन आज राति १२ बजेबाट अन्त्य हुने जानकारी सभा समक्ष गराउनुभएको छ । सदनको चालु अधिवेशन मंगलवार राति १२ बजेबाट अन्त्य हुने विषयमा उहाँले आज जानकारी गराउनुभएको हो ।
यस्तै प्रतिनिधि सभाको कार्यसूचीबाट गृहमन्त्री रमेश लेखकले संसद्मा सम्बोधन गर्ने कार्यक्रमहरू समेत हटाइएको छ । मंगलवार प्रतिनिधि सभाको बैठकमा गृहमन्त्री रमेश लेखकले सांसदहरूले उठाउनुभएका प्रश्नको जवाफ दिने कार्यसूची थियो ।
तर राष्ट्रिय प्रजातन्त्र पार्टीका सांसद दीपक बोहराको निधन भएसँगै उक्त कार्यक्रम कार्यसूचीबाट हटाइएको हो । सांसद बोहराको मंगलवार उपचारका क्रममा निधन भएको छ ।
आजको प्रतिनिधि सभाको कारबाही शुरू गर्दै सभामुख देवराज घिमिरेले भन्नुभयो, ‘माननीय सदस्यहरु विशेष कारणवश आजको क्रमसंख्या १ देखि क्रमसंख्या ८ सम्मका कार्यक्रमहरु सूची हटाइएको जानकारी गराउँछु । साथै माननीय गृहमन्त्रीले बोल्नको लागि समय समय माग गर्नुभएकोमा सो समेत हटाइएको व्यहोरा जानकारी गराउँछु ।’
