झापा । पूर्वमुख्यमन्त्री तथा नेपाली कांग्रेस कोशी प्रदेश संसदीय दलका नेता उद्धव थापामाथि हातपात भएको छ । शनिबार साँझ नेपाल प्रेस युनियन झापाले दोमुखामा आयोजना गरेको वार्षिक साधारण सभाबाट फर्किँदै गर्दा साँझ करिब ७ बजे पूर्वपश्चिम राजमार्ग अन्तर्गत कन्काई नगरपालिकाको जुकेखाडी नजिक थापामाथि हातपात भएको प्रहरीले जनाएको छ ।
बा१झ ६५३ नम्बरको गाडीमा घर जाँदै गर्नुभएका थापामाथि बा१झ १८७० मा सवार एक समूहले हातपात गरेको हो ।
आक्रमणबाट थापा सामान्य घाइते हुनुभएको थियो । उहाँको आँखा सुन्निएको छ । घटनापश्चात उहाँलाई उपचारका लागि विर्तासिटी अस्पताल लगिएको थियो ।
विद्युत् प्राधिकरण सुरुंगाका कर्मचारी सवार गाडीलाई थापा चढेको गाडीले ओभरटेक गर्ने क्रममा विवाद भएको थियो । कुटपिट गर्ने दुई जनालाई पक्राउ गरेको विर्तामोड प्रहरीले जनाएको छ । पक्राउ पर्नेहरूमा शिवसताक्षी- ११ का ४९ वर्षीय भक्तबहादुर कटवाल र कन्काई- ३ का ४२ वर्षीय पृथ्वी श्रेष्ठ रहेका छन् ।
