लमजुङ । लमजुङको दूधपोखरी गाउँपालिकाकी निवर्तमान अध्यक्ष छुपिमाया गुरुङको निधन भएको छ । क्यान्सर रोगले ग्रसित ५८ वर्षीया गुरुङको गएराति निधन भएको हो ।
क्यान्सर रोगको उपचार गर्दै आएकी गुरुङलाई सोमबार एक्कासी रोगले च्यापेपछि भरतपुर क्यान्सर अस्पताल लैजाने क्रममा राति करिब साढे २ बजे बाटोमै मृत्यु भएको पारिवारिक स्रोतले बताएको छ । गुरुङ विगत दुई वर्ष अघिदेखि क्यान्सर रोगले ग्रसित हुनुहुन्थ्यो। बीचमा रोग निको भएपनि उहाँलाई पुन: रोग बल्झिएको थियो ।
गुरुङ २०७४ सालको स्थानीय तहको निर्वाचनमा नेपाली कांग्रेसबाट गाउँपालिका अध्यक्षमा निर्वाचित हुनु भएको थियो ।
