सुनसरी । सुनसरी र मोरङको सिमाना छुट्टाउने बुढी खोलामा आएको बाढीमा परी एक जनाको मृत्यु भएको छ । बाढीले बगाउँदा अन्य तीन जना बेपत्ता भएका छन् । बिहानैदेखी परेको भारी वर्षाको कारण बुढी खोलामा आएको बाढीले सुन्दरहरैंचा-५ का स्थानीय ४ जनालाई बगाएको हो । तीमध्ये एक जनाको शव फेला परेको इलाका प्रहरी कार्यालय इटहरीका प्रहरी नायब उपरीक्षक टेक बहादुर कार्कीले जानकारी दिनुभयो ।
प्रहरीको टोली घटनास्थल पुगेर उद्धारको काममा जुटिसकेको प्रहरी नायब उपरीक्षक कार्कीले बताउनुभयो । मृतक तथा बेपत्ताको पहिचान खुलिनसकेको प्रहरीले जनाएको छ ।
जल तथा मौसम विभागले आज बिहान ११ बजेदेखी उक्त खोलामा पानीको बहाव उच्च भएकाले सतर्कता अपनाउन उक्त क्षेत्रका बासिन्दासँग आग्रह गरेको छ । दिउसो ३ बजेसम्म खोलामा बहाव उच्च रहने भन्दै एसएमएस सन्देशमार्फत विभागले सतर्क रहन आग्रह गरेको हो ।
