सिन्धुपाल्चोक । मनसुनी वर्षासँगै नदीमा पानीको बहाव बढेपछि सिन्धुपाल्चोकको अम्बाथानस्थित मेलम्ची खानेपानी आयोजनाको सुरुङको मूलद्वार बन्द गरिएको छ ।
मेलम्ची नदीको बहाव बढेर बाढी आई पानी धमिलिन थालेपछि आपूर्ति बन्द गरिएको मेलम्ची खानेपानी विकास समितिले जनाएको छ । समितिका अनुसार माथिल्लो क्षेत्रमा पानी परिरहेको र मेलम्ची नदीमा आएको बाढीले आयोजनाको बाँधमा समेत क्षति पुर्याइसकेको छ ।
आयोजनासम्म जाने पुलसमेत बगाएपछि आयोजनालाई सुरक्षित गर्न सोमबार मूल सुरुङको प्रवेशद्वार बन्द गरिएको हो । मेलम्ची खानेपानी विकास समितिका कार्यकारी निर्देशक रत्न लामिछानेका अनुसार मनसुन सक्रिय हुन्जेल पानी आपूर्ति गरिने छैन । मनसुन सकिएपछि मात्रै आयोजनाबाट पुनः पानी ल्याइने लामिछानेले जानकारी दिनुभयो ।
यसअघि जेठ ३१ गते नै मेलम्ची आयोजनाबाट पानी आपूर्ति बन्द गर्ने तयारी गरिएको थियो ।