पाल्पा । गाउँघरमा पञ्चेबाजा बजाउनेहरु भेटिन छाडेपछि पाल्पाको निस्दी गाउँपालिकामा रहेको बालहित माविले विद्यार्थीलाई प्रशिक्षण दिन थालेको छ ।
विद्यालयमा गठित जनप्रिय सहयोगी बालमञ्चका १० विद्यार्थीले टेम्को, ढोलक, सहनाई, दमाहा, झ्याली, नरसिंहालगायत बाजा बजाउन सिकिरहेको विद्यार्थी ईश्वर राना मगर बताउनुहुन्छ ।
बसाइँसराइ र वैदेशिक रोजगारीका कारण पञ्चेबाजा बजाउने मानिस भेटिनै छाडेपछि विद्यालयले कार्यक्रम नै बनाएर बाजा बजाउने प्रशिक्षण दिन थालेको हो ।
गाउँघरमा हुने बिहे, व्रतबन्ध, पूजाआजामा पञ्चेबाजाको माग हुने गरे पनि बजाउने व्यक्ति नभएर बाजा नै लोप हुने अवस्थामा पुगेको भन्दै विद्यालयले प्रशिक्षण दिएको प्रशिक्षक टेकबहादुर परियारले जानकारी दिनुभयो ।
गाउँपालिकाले सहयोग गरेमा विद्यार्थीका लागि पढ्दै कमाउँदै कार्यक्रम लागु गर्न सकिने पनि विद्यालयले जनाएको छ ।
