पाल्पा । पाल्पाको तिनाउ गाउँपालिका ६, मस्यामको चिदिसमा मंगलबार भएको जिप दुर्घटनामा आठ जनाको मृत्यु भएको छ । दुर्घटनामा १७ जना घाइते भएका छन् ।
सिद्धार्थ राजमार्गको डुम्रेबाट चिदिस सिखरडाँडा जाँदै गरेको लु.१ज २३७१ नम्बरको जिप डुम्रे र चिदिसको बीच भागमा दुर्घटनामा परेको जिल्ला प्रहरी कार्यालय पाल्पाका प्रमुख एसपी हेरम्ब शर्माले जानकारी दिए ।
मृत्यु तथा घाइते हुनेहरु स्थानीय चिदिस गाउँका रहेको उद्धारमा खटिएका दिनेश घिमिरेले कान्तिपुर टेलिभिजनलाई जानकारी दिए । घटनास्थलमा प्रहरी र स्थानीय बासिन्दाले घाइतेहरुलाई लुम्बिनी मेडिकल कलेज प्रभासमा उद्धार गरी पठाएका छन् । प्रहरीका अनुसार मृतक र घाइतेको पहिचान भने अझै खुलेको छैन ।